Latest News Editor's Choice


News / Regional

Ipostoli ligida lize liqaleke life enkonzweni

by NguThando Mpofu
23 Feb 2015 at 17:10hrs | Views
Kubeyisiphithiphithi komunye umuzi eKezi lapho obekukhonzela khona amalunga esipostoli ngemva kokuba elinye ilunga ligide laze lafa, uMthunywa ukuzwile lokhu.

Isiga lesi esitshiye izakhamizi zesiqintini seTshelanyemba zikhakhamele senzakale ngeSonto kuviki edluleyo ngesikhathi amalunga ebandla leli elibizwa ngokuthi ngeleSawasawa ekomunye umuzi.

Abakhulume lentatheli bathe umuyi uMandla Tshuma ubegida ehlabela lamanye amalunga aze aqaleke afe.

"Lathi asilankani silapha. Asazi ukuthi kuhambe njani ngoba uTshuma  wafika kuhle  sibili engumuntu oziqineleyo njalo engakhanyi ukuthi uyagula," kutsho omunye umzalwane ongazange athande ukuqanjwa ngebizo.

UMthunywa wenelise ukuxhumana loMnumzana Thomas Nyathi ongumnikazi womuzi okubhubhele khona ilunga lebandla leli njalo uvumile ukuthi kulesiga esinjalo esenzakala emzini wakhe.

"NgeSonto le edluleyo besilenkozo emzini wami, uTshuma ufike engcono loba besisazi ukuthi ubengezwa kuhle njengoba ubenatha amaphilisi eBP. Sicabangela ukuthi lokhu yikho okungabe kumbulele.

"Khathesi senza amalungiselelo omngcwabo labangakibo," kutsho uMnu Nyathi.

Isikhulumi samapholisa esabelweni seMatabeleland South uInspector Philisani Ndebele uthe udaba lolu kalukafiki endlebeni zakhe.

Kusenjalo, kulenye indoda yelinye ibandla eNorthend koBulawayo eqaleke yafa ngemva kokukhokhela umhlangano ngeSonto ngeviki edluleyo.

Indoda le ebikwe ngokuthi nguBrighton ohlala elokitshini leTrenance kubikwa yafa iqeda ukukhokhela umthandazo.

"UBrighton wathi esiya esitulweni sakhe ngemva kokukhokhela umkhuleko wawela phansi wahle wafa," kutsho omunye umzalwane.

Isikhulumi samapholisa koBulawayo uInspector Mandlenkosi Moyo uthe udaba olunjalo lufikile endlebeni zakhe.

"Samukele udaba lwendoda ebhubhe esontweni, eNorthend ngeSonto. Isidumbu sihanjiswe ukuyahlolwa," kutsho Insp Moyo.

Kubikwa umuyi ungcwatshwe eManama ngoLwesibili kuyonale iviki.

Source - uMthunywa