Bakhala ezimathonsi ngokuswelakala kwenkosi kaMthwakazi

NGESIKO lesiNguni asikho isizwe esihlala singelankosi ngakho uMthwakazi ondlela zimhlophe ukhala ezimathonsi ngodaba lokuswela inkosi yikho nje usubona kungcono ukuthi ukhethe inkosi yawo.

Lokhu kuvezwe zinkokheli zomdabu emkhosini wokukhumbula ibutho leMbizo yodumo obusesiqintini seGadadi eNtabazinduna ngoMgqibelo ngeviki ephelileyo.  Inkokheli lezi ziveze ukuthi ukusweleka kwenkosi kusuka kudale ukugugudeka kwamasiko ngoba amanye amasiko aqhutshwa yinkosi kuphela.

UMthunywa ukhulumisane loMnumzana Albert Nyoni uMgcinisihlalo weMatojeni Cultural Society oveze ukuthi indaba yokusweleka kwenkosi idala ukuthi uMthwakazi engabi lesithunzi.

"Angithi isizwe yisizwe ngenxa yenkosi kanye lamasiko aso pho esethu isizwe sakoMthwakazi esingela nkosi singaba yisizwe esinjani. Kubalulekile ukuthi uMthwakazi akhethe inkosi yakhe," kutsho uMnu Nyoni.

Induna yeNtabazinduna uMnumzana Nhlanhla Ndiweni ubikele njalo uMthunywa ukuba akulasiko elingaqhutshwa kuhle kungelankosi ngakho inkosi iyafuneka koMthwakazi.

"Noma singaqhuba mikhosi bani eyamasiko sithi sesiwavuselela kodwa nxa singelayo inkosi ngeke senelise njalo siyabe siyisizwe esingaphelelanga ngokwesiko. Ngezinye indlela ngingathi nxa singelankosi siyabe sipheka imboza.

"Ngikhuluma nje khathesi akula sigodlo koMthwakazi njalo noma singaba khona siyabe singelalutho okuyikuthi sifuna inkosi ezahlala kuso. Kodwa njengoba abadala batsho emkhosini wesikhumbuzo senkosi uMzilikazi ukuthi kufanele ukuthi emnyakeni ozayo sibe sesiyikhethile inkosi, ngilethemba lokuthi kuzenzakala lokhu.

Okunye njalo njengoba ithole lisadingwa kufanele nxa sesithe salithola uHulumende alibale esisekelweni sombuso ukuze libe lesithunzi lihlonitshwe njalo," kutsho induna uNdiweni.

Ekhuluma loMthunywa uMnumzana Samson Sibanda oyisanunse esithenjiweyo koMthwakazi uchaze ukuthi uMthwakazi kufanele abelenkosi ukuze agubhe inxwala.

"Isizwe sikaMthwakazi kufanele sibe lenkosi ukuze siqhube umkhosi wokugubha inxwala ngoba ivulwa yinkosi kuphela. Ukusweleka kwenkosi yikho okudala ukuthi lezulu lingani kahle koMthwakazi ngoba alisacelwa ngendlela njengoba ingekho inkosi eqinisa ukucelwa kwalo ngemfanelo. Ngakho-ke kufanele uMthwakazi akhethe inkosi eyiyo ezalawula ukucelwa kwezulu kanye lokuqhutshwa kwamanye amasiko," kutsho uMnu Sibanda.

Noma nje ithole lingakakhethwa koMthwakazi kodwa kukhanya angathi inkatho izadla koKhumalo ngoba kuthe kusemkhosini wokukhumbula ibutho leMbizo kulomlisa weNtabazinduna ovezwe ngokuthi nguKhumalo otenywe yinyosi uNkosilamandla kwaze kwajabula ontulo emadwaleni. Lokhu kwenze intatheli yabona ukuthi kunuka santungwana koKhumalo.