Latest News Editor's Choice


News / Local

Ingcwaba livuka ligejiwe isidumbu singekho lengcwabeni

by Johas Moyo
13 Mar 2016 at 14:23hrs | Views
KUSIGA esihlasimulisa umzimba kucatshangelwa ukuba kulabakhunkuli besigabeni seGwenzi  eZhombe njalo omunye wabo ongumkhokheli welinye ibandla abaphande isidumbu basithwala ebusuku kuviki ephelileyo osokubangele ukukhombana ngeminwe phakathi kwezakhamizi lezi.

Impicabadala le yenzakale esigabeni senduna uNtabeni eKwekwe lapho ingcwaba likamuyi uSenior Ncube elavuka liphandiwe isidumbu singekho phakathi. Kubikwa amalunga emuli yakoNcube alandela umzila, owawutshengisa ukuthi isidumbu sathwalwa ngebhala njalo kwakulenhlabathi eyayihamba ichitheka phansi, owabatshiya emzini womdikoni lo owaziwayo (igama silalo).

UMthunywa uzwe ukuthi amalunga emuli le azama ukulonda ukuthi kuhlolisiswe ngodaba lolu kodwa amapholisa kazange athande ukuba yingxenye yalokhu lanxa indaba le isachwayisiswa. Umzukulu kamuyi uMnumzana Elliot Moyo ubikele intatheli ukuthi akuqalisi ukuthi kuphandwe amangcwaba abantu, kabakaze bekunanzelele nje  kodwa lokhu sekungaphezulu ngoba umuyi wathwalwa ngabathakathi bahamba laye.

"Silokudana, asikukholwa njalo silokhu sithithibele ukuthi ubabamkhulu wathathwa ngubani njalo wasiwa ngaphi? Lokhu kwenza inhliziyo zethu zingabi lokuthula njalo kasenelisanga ukuthola uncedo emapholiseni ngoba isifiso sethu sasifuna ukuphanda sibone ukuthi abathakathi laba bathetheni njalo batshiyeni," kutsho uMnu Moyo.

Okunye okwamangalisa amalunga emuli le yikuthi unyawo ababelulandela lwalugqoke ithenisi kodwa luthe lufika ethangweni lwalo osolwayo ithenisi lakhitshwa njalo kuleyondawo kwavuka kudonswe lothango okwenza kubenzima ukuthi lomphakathi umchaze.

UMthunywa wenelise ukuxhumana losobhuku wesigaba uPimrose Khanye ovumileyo ukuthi kulokuganga okukhona esigabeni sakhe ebika ukuthi laye uphelelwe njalo lokhu sokungaphezulu kwamandla akhe njengoba kulokhe kuqhubekela phambili kuhlolisiswa ngokuphandwa kwengcwaba leli.

"Kulesidumbu esavuka siphandiwe njalo unyawo lwalandelwa lwayaphelela ethangweni lwesinye isakhamuzi esingumdikoni kodwa kangisoze ngithi nguye owakwenzayo lokho ngoba kungela owambambayo xhaka njalo akusela bufakazi kodwa umuyi waphandwa njalo wathwalwa ngoba inhlabathi yakhe yayihamba ichitheka  endleleni.

"Abantu abadonsa amahlahla ekuseni bebiya yibo abenza unyawo lusicatshele. Lowo muntu waqala ehamba egqoke ithenisi kuthe esechaphe isifula eduze lomuzi wakhulula wahamba ngonyawo, unyawo lolo lwacatsha ethangweni lapho," kutsho usobhuku uKhanye. Uphethe ngokucebisa izakhamizi ukuthi zekele ukuganga ngoba abantu sebeze besesaba ukubeka abantu kule indawo.

"Ngicela abantu bekele ukuganga ngoba akuselakuthula lapha. Abantu sebesesaba ukungcwaba izinini zabo besesaba ukuthi izidumbu zizavuka zithethwe njalo," kutsho uNkkz Khanye.

Intatheli kayenelisanga ukuxhumana lenduna ngoba ucingo lwayo lungangeni.


Source - umthunywa