Isavunguzane sibathwalisa nzima ezimfeni eTsholotsho

KULESAVUNGUZANI esesibangela ukuthi abantu beTsholotsho, koBhule bazidle ingqondo nanko phela zonke izikhathi nxa abantu bebuthene bebeka umuntu kumele kube lesavunguzane esibaphazamisayo nxa sebengcwaba.

Isavunguzane lesi esesithwalise abantu amagabha avuzayo emingcwabeni sokukabili siphambanisa imingcwabo njalo esikwenze ngeSonto emngcwabeni wakoNgwenya kutshiye izakhamizi zakule indawo zitshe amathe.

Ekuvakatsheleni lindawo uMthunywa uzwe ukuthi lokhu okwenziwa ngumoya lo abantu kabakaze bahlangane lakho njalo kuyisimanga kibo.

Ekhuluma lentatheii kaMthunywa okhetha ukubizwa ngokuthi nguNkosikazi Ndovu kuphela njalo ovayesemngcwabeni wakoNgwenya uveze ukuthi lumoya wathutsha sebeqedile ukungcwaba wafika waphambanisa wonke umuntu owayebuthene lapha.

"Isavunguzane sathutsha sivelela ngezansi yomuzi seza ebantwini abangcwabayo safika savuthela sonke lapha omunye udade wawela phansi.

Senza lokhu okungaba yimizuzu elitshumi sasesidlulela phambili," kutsho uNkkz Ndlovu.

Kuzwakale ukuthi isavunguzane lesi sabhoda kuleyondawo okwesikhathi esingaba yimizuzu elitshumi okwenza abantu babaleka bayamela khatshana.

"Isivunguzane lesi ngabona siyahlola sibili. Okwenzakala koNgwenya yikho kanye okwenzakala komunye umgcwabo kamakhelwane lapho esafika saphephula amalembu ayevale ibhokisi sathela lomuyi ngenhlabathi.

"Wonke umuntu owayelapho wacela ezinyaweni esiyacatsha," kuqhuba uNkkz Ndlovu.

Isicino sikamuyi uMaNgwenya, uThamsanqa Ngwenya uveze ukuthi kabalankani ngesavunguzane lesi ngoba saphinda saphenduka ngemva kwamalanga amathathu bengcwabe unina.

"Isavunguzane saphinda saphenduka ngemva kwamalanga amathathu savuthela phezulu kwengcwaba okwemizuzu engaba ngamatshumi amathathu, saphephula amaluba wonke ayefakwe lapho" kutsho uThamsanqa.

Uveze ukuthi kuyisimanga kibo konke lokhu ngoba unina wayengumuntu ozisontelayo ngakho ke badidene ingqondo njengemuli.

"Kuyinto engazwisisekiyo kithi njalo abadala bafuna ukuhlala idale ukuze kendingwe ukuba kuyini okuhluphayo lapha," kuqhuba uThamsanqa.

Ongumlobi wezingwalo, owaloba ugwalo lwesiNdebele lwe "A-Level njalo esazi ngembali lamasiko esiNdebele uMnunzana Naison Thwala uveze ukuthi lezizinto ziyenzakala kusiya ngemihloboyabantu lalapho abadabuka khona.

"Kwesinye isikhathi uyathola ukuthi yimimoya yamalinda kiwesinye isikhathi kuyabe kuyiziga nje ezenziwa yikuganga kwabantu," kutsho uMnu Thwala.

Uveze ukuthi kwesinye isikhathi kuyabe kulento ephambanisekileyo kumasiko kube sekusiba yisibonelo esivela kwabaphansi sikhombisa lokho okuphanjanisiweyo.

"Uyathola ukuthi kwesinye isikhathi kuyabe kungabaphansi abakhombisa ukuthi abantu sebelahle amasiko abo. Kungalungisiswa lokhu izinto ziyaphindela esimeni sazo," kuqhuba uMnu Thwala.