Isikhanyiso ngamagama athize

ISIZWE
Nxa sikhuluma ngesizwe siqonde labo bantu abaqoqeke ndawonye ezweni elilodwa ngaphansi kombuso owodwa,kungenzeka ukuthi laba bantu bengakhulumi limi lunye,bengalandeli siko linye kodwa ngenxa yokuthi bahlala ezweni elilodwa bakha sizwe.uMzilikazi wahlanganisa izizwana ezinengi wabumba isizwe esisodwa ngaphansi kombuso owodwa wamaNdebele ngaphansi kwenkosi eyodwa.

ISIBONGO
Ngesibongo sikhuluma ngomndeni othize ozihlanganise ngaphansi kukakhokho noma umholi wawo.Lowo mndeni uya uzibize ngegama lalowo ongumsuka wawo.Kuhamba kuhamba lowo mndeni uma usuwande kakhulu ube usuzibiza ngaleli gama kuze kube yisibongo ozokwaziwa ngaso.Yikho nje silesibongo sakoDhlamini esivela kuDhlamini.uDhlamini kwakuligama lomuntu.Abantwabakhe baziwa ngokuthi  ngabakoDhlamini.

ISITHAKAZELELO
Uma sikhuluma ngesithakazelelo sikhuluma ngento emqoka kakhulu ebantwini abansundu ngoba uma umuntu wesiNdebeleni umthakazele wenze into enkulu empilweni yakhe.Yini umahluko phakathi kwesibongo lesithakazelelo?Impendulo kayilula ngoba kukhona abathatha isibongo basenze isithakazelelo abanye bathathe isithakazelelo  basenze isibongo.Umehluko omkhulu  yikuthi isthakazelelo siba ngesabantu bezibongo ezinengi ezehlukeneyo kodwa zibe zidabuka enhlokweni yomndeni owodwa.

Isibongo sivela enhlokweni yomndeni  kwehle ngoliba lwaso ,kodwa isithakazelo sithinta abantwana benhlonko yomndeni eyasungula leso sibongo.Umzekeliso ngesibongo sakoKhumalo, Siwela, Mabaso, Nkosi(Ndlangamandla), izibongo lezi zehlukene ngokubona kwabantu kodwa ikhona into ebalulekileyo okuyiyo ezihlanganisayo lezi zibongo. Uma uhlangana lomuntu wakoKhumalo kawulibali ukuthi kuyena Mntungwa kaMbulazi, kunjalo futhi laku Mabaso loNkosi! Kanti ungubani lowu Mntungwa? Umntungwa nguyise kaKhumalo lo Mabaso ungukhokho kaSiwela ozala abako Nkosi(Ndlangamandla) .Nxa usunanzelela umzekeliso lowu ukhomba ukuthi izibongo lezi kukhona okuzihlanganisayo.Lokhu okuzihlanganisayo yiso isithakazelelo.

ISITHOPHO
Ngenye yezinto ezididayo ebantwini abanengi leyi.Emndeneni owodwa onesithakazelelo esisodwa kodwa kube khona ukwehlukana kwezindlu.Kubakhona iNdlunkulu lapho okuphuma khona inkosana,bese kuba khona iKhohlwa eliba yinkosikazi yesibili,bese kuba khona iQadi okungunkosikazi wesithathu emzini wendoda.Uma indoda isaqhubeka ngokuganwa kuba khona leSokanqangi okungunkosikazi wesine ongeniswa eKhohlweni kanti iQadi lona lingeniswa eNdlunkulu. Angiqondanga lapha ukuchaza kabanzi ngezindlu lezi kodwa ukukhanyisa kancinyane nje! Ngiphe njalo umzekeliso ngabakoKhumalo  labakoMabaso. Laba ngamadodana endoda eyodwa kodwa basebe yakha imizi etshiyeneyo oKhumalo laboMabaso sekuyizibongo. Noma nje lezizibongo zivela ndawonye kodwa ngeke utsho uthi kumuntu wakoMabaso Mzilikazi kaMatshobana ngoba akumthinti yena ngoba laba ngabendlu kaKhumalo hatshi ekaMabaso.Nxa uthopha umuntu umthopha ngoyise noma ngoyise omkhulu.Umuntu oliNguni  angakukhiphela noma yini nxa ungamthopha! Ungambiza ngesibongo sakhe,umthakazele, kodwa ngeke kufane nxa umthophile,lapha usuka uthinte inhliziyo yakhe ngoba ubiza uyise.Ubona kanye ukuthi uyamazi ngqo! Omunye uze aphumisele athi 'wazi mina jaha leZansi!' Lami nginje nxa ungeza kimi mathupha uthi kaBhalaphansi, Ndendele! Ngiyeqa nxa kuyikithi benginatha ngingaze ngihitshwe, habe uyabe ungithinte khona kanye esikhonkosini nqo!

------------------
Ngqabutho Dhlamini can be contacted at ndendele@gmail.com