Ngimbeleni phansi kotshani ngenhla kwesihlahla somphafa

Umuntu nxa esehambile emhlabeni, ubephelekezelwa ngendlela ethile njalo bekugcinwa futhi kwenziwe amasiko wonke ngendlela okhokho bethu ababesenza ngayo.

Ukungcwaba.

Kudala ithuna lomufi lalimbiwa litshone okungango kuthi umuntu omdala engabonakali nxa emi phakathi kwalo, besekumbiwa phansi eceleni, kwakheke indlu encane ukuze umhlabathi ungaweli phezu kwamufi. Umuntu ube goqelwa ngesikhumba senkomo yokugeza izandla, le yinkomo ebihlatshwa umufi esetshonile. Lapho kumbiwa ithuna likankosikazi walapha ekhaya belembiwa budebuduze lesiphala ikanti elomnumzane belembiwa eduze kwesibaya. Inkosana yayihlubula impanhla  igwaze ngomkhonto empundwini wesibaya ime njalo kuze kuphele ukumbiwa kwethuna.

Umnumzane wayekhitshwa endlini esefumbathiswe inhlanyelo yamabele, eyomumbu, kunye leyendumba, ukuze acelele abasele ukudla emadlozini lapho obekukholelwa ukuthi usesiya khona.

Lapho kufiwe kwakuzilwa okunengi, kwakungalinywa, kungathezwa, kungahlakulwa, kungatshaywa khwelo, amadoda labafazi bengahlangani ecansini lokunye okunengi. Amakhosikazi kamufi ayephuma endlini egaxe zonke izembatho zakhe, ephethe lamahawu akhe, ekhokhelwa ngumfazi wakuqala.
Ithuna laligqitshwa bese kuthi lingakagcwali kufakwe insika isinqunyiwe. Phela insika yayisumbulwa lapho sekutshone umnumzane, ukubonisa ukuthi lensika yekhaya isiphangalele.

Abazongcwaba babelahlela amagade ngamunye ngamunye ethuneni bevalelisa umufi. Ngakusasa komngcwabo  amakhosikazi labantwana bomufi babeyesiya emfuleni bayogelwa amakhanda.  Ngalolusuku kwakuhlatshwa inkomo yegqibo. Amadoda ayebiya ngosaba ethuneni ahlanyele isihlahla somphafa.

Ukuhlanjiswa kofelweyo.

Lalo lelisiko lalenziwa lapho kubuywa emngcwabeni. Kwakuhlatshwa imbuzi. Lembuzi yayidliwa lamakhubalo. Yayiphekwa ivuthwe kakhulu bese kubizwa bonke abomndeni. Imbuzi yayisikwa isitho esithile  sibe ngamaqatshana amancane. Yilowo lalowo abesethatha iqatha ngesinye isandla, ngesinye athathe ikhubalo. Alume ngapha langapha bese ehlafuna kanyekanye. Babekwenza lokho  baze baphele bonke abomndeni. Babeqeda lapho besebeyidla nje yonke inyama bengasayitshebi lakhubalo. Leli siko lalenzelwa ukuba kuphume umoya omubi njengoba kukhona osuke etshonile lapha ekhaya, lokhu kwakwenzelwa ukuthi  bangavelelwa ngamashwa.

Ukukhalelana.

Lapho kutshoniwe  kwakusuka abantu ekudeni bezokhalela labo abafelweyo. Noma sekwaphela iminyaka eminengi, nxa lingazange libonane lomuntu owatshonelwa, kufanele uqale ukhuze umhlola uthi, "Langalezo indaba ezimbi zokutshona kukasibani bani, singasabonananga".

Ukwelapha amakhosikazi.

Amakhosikazi ayeselatshwa ngemithi thizeni ukuze akwazi ukuzila isikhathi esifaneleyo, etshonelwe ngumnumzane. Wayesifa lo oweyezama ukungaziphathi kahle kulamakhosikazi ngesikhathi esazilile. Kwakujwayelekile  ukuthi  umnumzane azilelwe iminyaka emibili.

Ukungena.

Lelisiko lokuthi  umfowabo omncane kamufi abheke izingane lomuzi womfowabo aze athathe inkosikazi yakhe layo ibe ngeyakhe. Abesifazane babekhitshwa leyomithi ababeyifakwe bezila kuqala besebelatshwa phambi kokuthi bangenwe.

Lapho kukhotheme iNkosi.

Kwakungamenyezelwa ukugula lokukhothama  kweNkosi. Zaziphela inyanga zize zibentathu kungabikikwanga ukuthi iNkosi isikhotheme. Lokhu kwakwenzelwa ukuba zingasizakali ezinye izizwe zizohlasela isizwe singakabi leNkosi. Endlini lapho kwakuhlala khona isidumbu seNkosi kwakuhlala amadoda amadala ehlezi etshisa amathambo enzela ukugqiba iphunga. Isidumbu sasisongwa ngezikhumba zenkabi. Lapho isikhotheme iNkosi kwakuhlatshwa izinkabi zomgando wonke amalanga, ngayinye ngelanga elilodwa njalo nje.

Amabutho ayeze atshelwe sekuzaphela inyanga yesithathu. Labo babekufihla lokhu ebantwini kodwa, kwenziwe amalungiselelo okufihlwa kweNkosi kuze kubekwe leyinye iNkosi.

Ukungcwatshwa kweNkosi.  

Indlinza leNkosi lalimbiwa yizinduna zesizwe. Lalimbiwa enhla komuzi weNkosi. Lalithanyelwa phakathi lapho selimbiwe. Kwakuqale kubulawe amadoda azophelekezela iNkosi endlalwe phansi. Isidumbu seNkosi besesingeniswa zinduna ezinkulu egodini. Zonke izinto zeNkosi ezembathwayo lazo zazigqitshwa layo.
Emva komngcwabo indlinza leNkosi laleluswa kakhulu, kwakukubekwa amabutho ayelala elindile khona. Lokho kwakwenzelwa ukuthi  umhlabathi wedlinza ungathathwa ngabathakathi bayothakatha ngawo.

UVelempini Veap Thuthani Ndlovu ngomele iJoshua Nkomo Cultural Movement (JNCM) kweleSouth Africa. iJNCM yinhlanganiso yokuthuthukisa ezamasiko. Ungamthinta ku veapndlovu@gmail.com noma kuwhatsapp 0824407756.