Ababalisi beMatopo High bacela ucansi kubafundi

ABAFUNDI beMatopo High abangamankazana sebedlela egilweni nanko phela sokuvele ukuba  kulababalisi asebethwalise abafundi laba amagabha avuzayo ngokucela ukuya emacansini labo, uMthunywa ukuzwile lokhu.

Sekuyinsakavukela umchilo wezidwaba kulesisikolo ukuthi ababalisi besilisa bahlukumeze amankazana nanko phela kubikwa kulomunye umbalisi wakulesisikolo owamiswa emthethwandaba wabuya waxotshwa ngemva kokutholakala elecala lokuhlukumeza abantwana besikolo.

UMthunywa uncwetshwe indlebe njalo ukuthi indaba le ivele emhlanganweni wababalisi obekhona kuyonale iviki lapho umphathi achaza ngokuhlukuluzwa kwabafundi ethi ithumba sokumele libhoboke ngoba kuyinto embi.

Abasiki bebunda babikele iphephandaba likazulu ukuthi kuyonale ithemu ephelileyo kulabantwana abedlula abathathu ababhekane lokuhlukunyezwa okufanayo kodwa inkokheli zesikolo zikutshaya indiva.

Kufike endlebeni zikaMthunywa ukuba kulesinye isisebenzi sesiphaleni sezingwalo (librarian) uMnumzana Dominick Ngwabi okuvele ukuba kuze kube le-strike wabizela omunye umfundi okuFomu 3 ngasese ethi ucela ukuthi baye emacansini ngoba kungelamuntu ozababona.

Iphephandaba likazulu lixhumane loMnu Ngwabi yena ovumileyo ukuthi unkazana lo bakhuluma bonke kodwa kazange acele ukulala laye.

Uthe wayefuna nje ukumlaya ngoba uyise wayeke wafona esikolo ekhonona ngendlela aziphatha ngayo.

"Umntwana lo ngakhuluma laye sibili. Ngambizela eceleni ukuze ngimqondise ukuthi angaphindi ahlukumeze abazali ngokungabhadali imali nxa eyiphiwe," kutsho uMnu Ngwabi egagasa.

Kusehlakalo esifanayo omunye njalo umbalisi ofundisa oFomu 6 kubikwa laye ekupheleni kwethemu wacela ucansi komunye umfundi.

Kuzwakele ukuthi umntwana lo wahamba wayabika ehofisini umbalisi lo bamkhuza kwaba yikuphela kwendaba.

Okusobala yikuthi indaba ezinengi zitshaywa indiva ngabakhokheli besikolo kukanti zilakho ukuphambanisa ikusasa labantwana.

Ekhulumisana lentatheli umphathisikolo weMatopo uMnumzana Gardson Sibanda uthe indaba zabantwana abahlukunyezwa emacansini azikafiki kuye, akwaziyo ngokombalisi owaxotshwayo ngokusemthethweni.

"Kulombalisi owaxotshwayo sibili. Lezi ezinye indaba azikafiki kimi mhlawumbe yikuthi kulengatsha ezinengi ezikhangela ngesiphatho sabantwana.

"Njengoba selitshilo sengizazama ukuchwayisisa ukuze labo abonayo bajeziswe," kutsho uMnu Sibanda.

UProvincial Education Director esabelweni seMatabeland South uNkosikazi Tumisang Thabela uthe umbiko onjalo abakawutholi kodwa bazenza noma yini okusemandleni abo ukuvikela abafundi.

"Besingakabikelwa udaba olunjalo kodwa ababalisi kumele behlale bekwazi ukuthi  ubudlelwano bamacansi asibuvumeli thina. Otholakala esenza into efana laleyo uyaxotshwa umsebenzi," kuchaza uNkkz Thabela.