Entertainment / Music
Isilo samaZimbabwe
29 Oct 2016 at 11:47hrs | Views
Khalani maZimbabwe
Khalani kuzwakale ilizwe lonke
Khalani kusukela kuZambezi kusiya kuLimpopo
Khalani kusukela eMangwe kusiya eMutare
Khalani kusukela eRamokgwebane kusiya Chirundu
Khalani kusukela eMpoengs kusiya eMlambapeli
Khalani bantwana benhlabathi
Khalani maZimbabwe
Ziph'inkomo zikababa?
Zon'ezaziholwa yinkunz'emnyama
Kwenzakalani sezitshopolwa liqhude?.
Kambe yen'owaliholela umohloka ngubani
Kambe yena owalinik'amabele ngubani?
Lazithathela amabele na?
Bhekani manje nant'iqhude selisidla nalapho okungamelanga lidle khona.
Sekuyibu tshopo tshopo!!!!
Indawana zonke
Khalani maZimbabwe
Isikhalo senu kasaziwe eAfrica
Isikhalo senu kasaziwe eMelika
Isikhalo senu kasaziwe eAustralia
Isikhalo senu kasaziwe eAsia
Isikhalo senu kasaziwe Europe
Vungazelani umhlaba wonke
Hlokomani lina bantwana besilo
Khalani maZimbabwe
IZimbabwe yilizwe lenu
Ilizwe labokhokho benu
UMphakathi umasongwa
Osongwe yiBotswana
Wasongwa yiZambia
Wasongwa yiNingizimu Afrika
Wasongwa yiMozambique
Khalani maZimbabwe
Kuzosabela zonke izizwe nezizwekazi
Mhla liphuma ijumo
Mhla lithi sesikhona
Mhla konke kusithi ndandalazi
Mhla indlubu ihlutshwa ekhasini
Mhla imbambo zehlukaniswa lomgogodla
Khalani maZimbabwe !!
Khalani MaZimbabwe
Ilotshwe nguSikhumbuzo Moyo
Iingaxhumana naye ku sikhumbuzomoyo82@gmail.com
Source - Sikhumbuzo Moyo
