Latest News Editor's Choice


Opinion / Columnist

Soul Brothers - A poem by Thembani Mthembo Dube

05 Feb 2012 at 05:53hrs | Views
Soul Brothers



Ziyaduma ziyajuluka kwaMbulazi,
Ngumdumo womculo wamaSolosolo bakaNdaba
Ogandaganda bamampela
Wuluju kuphela, ithaph' utshiye bantu beNkosi
Omncane lomdala bajabula bengaqgize qhakala
Injabulo helele kwaNthuthu Ziyathunqa
NgamaSolosolo lawo bakaNdaba.

Emashabini yimvoxoxlo emini lebusuku
Siyaxokozela isizwe samaNdebele
Umsindo phothololo kwelamaNdebele
Ziyaduma ziyawa ezamaSolosolo lapha
Ezabo gandaganda bamampela
Isimame sesiphakamise amarogwe
Siyatshitshimba siyatshitshizela
Habe bantu beNkosi kusinwa kudedelwana
Amajaha aseginqe impandla sampophoma zaseVitoli
Belo isitiki sesivutha bhe ngenxa yomshishimbo lo.
'Kugug' othandayo' kusho esakoMoyo sitshibilika esitikini sidlala ibhamujayivi lesakoNdlovu,
Oh kwaze kwamnandi kwaNthuthu Ziyathunqa
Ziyaduma ziyawa ezamaSolosolo kwaNthuthu.

Amakhehla ayabubhuqa eMathonisa ebhawa
Kant' eMadlodlo bayabuvuthuza ngempela
Buyehla buyageleza lemigogodla yakwabo
Amakhehl' agid' afinqane ngenxa yamaSolosolo
'Kugug' othandayo' kusho ikhehla eselimpunga uNgangelizwe Mdlongwa
Efinqana etshitshiz' ephulul' amadevana akh' amhlophe nke
Umsindo phothololo eMathonis' ebhawa,
Imvoxoxlo zal' eMadlodl' ebhawa
Ogandaganda babhokile sinini seNkosi
Ziyaduma ziyaw' ezamaSolosolo.

E-Barbourfields amahlolanyam' adaya inguqu
Ngekhefu lomdlalo badlal' amaSolosolo
Abalandeli bayaxokozela bagida ngamazwane bahlabele ngempumulo
'Ongafuniyo uyekela' batsho bengaqgize qhakala
Ziyawa ziyadum' ezamaSolosol' eMagumeni
AmaSolosol' avimbile kwezomculo sinanakazana sikaMdali
Izinhlupho zonke zomhlaba ziyakhohlakala ngokupheleleyo
Ubunandi helele kwaBulawayo
NgamaSolosolo lawo.

ERenkini amabhasi ayaholoba njalo ayahwabha
Asezaphumel' emaphandleni phela
Okhondakithi bahlohla impahla emaphahleni amabhasi
'Amafidlongo amafidlongo ngapha' kusho abathengisi bezifela emlonyeni phakathi langaphandle kawamabhasi
'Isayeeeke isayeeeke sikaJamluthi loBhusumani ngapha' kuvungama abanye abathengisi njalo
Osonqola babhensile bafuqa impahla zabanikazi bohambo
Sebeginqe tshitshi
Yisiphithiphithi lapha njalo umsindo yiphothololo
Ziyaduma ziyawa ezamaSolosolo enzikini yalesisiphithiphithi
Ngogandaganda bamampela laba
Umhambi, umthengisi, utsotsi, usonqola, ukhondakithi kanye labatshayeli banqekuza amakhanda ngenjabulo
Ziyawa ziyaduma ezamaSolosolo
Oh kwaze kwamnandi kwabulawayo.

EmuRambinta growth point yimvengevenge
Bagida baze baqethuk' emaVinkilin' abantu
Amantombazana ashaya iqga witshu libabelele
Ziyawa ziyadum' ezamaSolosolo
MaSolosolo maSolosolo liyinqaba kwezomculo.


Source - Thembani Mthembo Dube
All articles and letters published on Bulawayo24 have been independently written by members of Bulawayo24's community. The views of users published on Bulawayo24 are therefore their own and do not necessarily represent the views of Bulawayo24. Bulawayo24 editors also reserve the right to edit or delete any and all comments received.