Donsa amasokisi Kelvin Kaindu

NGESONTO iHighlanders leCAPS United zivuselela impi yazo eyaqala kudala, kubangwa ukuthi yiphi enkulu kuleyinye kumdlalo wenguqu yeligi yeCastle Lager, eBarbourfields.

Loba isizini isaqala, isifikise iviki lesithupha, umdlalo lo angeke ukhangelelwe phansi ngoba ubalelwa kwemikhulu, edonsa abalandeli abanengi kuleli. Womabili amaqembu la aqalise umkhankaso wawo ngendlela edanisayo nanko awakatholi imiklomelo efaneleyo, ngendlela abatshazwa ngayo emdlalweni. Ukunqoba kulumdlalo osezingeni eliphezulu kungaba yinhlansi evuselela imikhankaso yawo exegayo kuligi yeCastle Lager.

Enkambeni yeHighlanders isimo kasijabulisi. Kumidlalo emihlanu iBosso ilemiklomelo eyisithupha kuphela, ihlezi endaweni yesithoba munwe munye.

ICAPS United yona okwayo akukhulumeki. Isebunzimeni. Isilemiklomelo emine, inqobe kanye kuphela, okuvuse ulaka kubalandeli bayo abafuna ukuthi umqeqetshi uLloyd Chitembwe axotshwe.

Ngempelaviki umqeqetshi lo uphume enkundleni yeBaobab ehanqwe yizikwamula, nanko abalandeli beMakepekepe kade besidla amahabula, bekhala ngokudliwa kweqembu. ICAPS United inqotshwe 2-1 yiNgezi Platinum.

Umqeqetshi lo uthe kujwayelekile kumdlalo wenguqu ukuthi kuvungame imizwa nxa iqembu lidlale kuhle.

"Kujwayelekile lokhu. Kade ngafika kulumsebenzi ngakho ngiyazwisisa ukuthi iqembu leli limi njani. Impumela yiyo eqakathekileyo ekucineni. Nxa singanqobi, abalandeli kumele bazonde," kutsho uChitembwe.

Ngesizini edluleyo iHighlanders yanqoba 2-0 eMagumeni. ICAPS United yaphindisela nge 3-2 kuhlandla lesibili.

Umdlalo phakathi kwalezi uhlala ungojabulisayo ngoba kudlalwa inguqu kuzwa.

Loba izinga lobunandi bomdlalo selehla kumathimu la, abalandeli balokukholwa ukuthi bazakholisa ngeSonto. Yikho bewubiza ngokuthi yiBattle of the Cities.

IHighlanders kumele isebenzise lelithuba ukuyikhulela iCAPS United eBarbourfields kodwa umqeqetshi wayo uKelvin Kaindu kumele aqaphele, abophe ziqine. UChitembwe ufuna ukugcina umsebenzi njalo ufuna ukuthi nxa ebuyela eHarare, kube kuthokoze bonke abeGreen Machine.

Ngokunjalo, kukhangelelwe ukuthi kugcwale phamu eMagumeni.

Imidlalo yeCastle Lager Premiership ngeviki lesithupha:
NgoMgqibelo:
TelOne v Ngezi Platinum Stars (Ascot Stadium), Bikita Minerals v Triangle United (Gibbo Stadium), Yadah Stars v Scottland FC (Rufaro Stadium), FC Platinum v Greenfuel (Mandava Stadium), ZPC Kariba v Kwekwe United (Nyamhunga Stadium), Simba Bhora v Manica Diamonds (Wadzanayi Stadium)

NgeSonto
Highlanders v CAPS United (Barbourfields Stadium), Herentals College v MWOS (Wadzanayi Stadium), Dynamos v Chicken Inn (Rufaro Stadium)