Indoda ithonisa amalobolo emangcwabeni

ZISELE zitshe amathe izakhamizi zeLuveve emangcwabeni akulelilokitshi koBulawayo ngemva kokuba elinye ixhegu limise umngcwabo lithi umzukulu walo ngeke angcwatshe indodakazi yakhe ingalotsholwangwa.

Isehlakalo lesi senzakale ngoLwesihlanu kuviki ephelileyo lapho obekungcwatshwa usane obeselulenyanga ezimbili lungabekwanga ngenxa kokuswelakala kwemali.

Kubikwa ixhegu leli uMnumzana Simon Ncube ndawonye lonkosikazi walo, uMaSibanda abavela eLupane bavuke ubhova bathonisa imali yamalobolo kumkhwenyana wabo, uLovemore Mutasa obengekho lasemangcwabeni befuna umzukulu wabo alotsholwe engakabekwa.

Ekhuluma ngaloludaba omunye umakhelwane  uNkosikazi Thandiwe Dlamini uveze ukuthi kalankani ngehlazo elenziwe nguMnu Ncube ngoba ilokitshi lonke liyazi ukuthi besekulamaviki amahlanu isidumbu sisemotsha ngoba imuli yakoMutasa isehluleka ukubeka umuyi.

Kubikwa imuli le ize yaphathiswa nguKhansila wakule indawo ukuthi umuyi abekwe.

"Kabalanhloni abanye abantu mpela, ngilapha nje lokhe ngingakukholwa ukuthi abantu bayekela umzukulu wabo ebola emotsha babuye sebefuna imali yamalobolo kulokuthi bazoduduza umntanabo," kutsho uNkkz Dlamini.

UMthunywa uxhumane loNkosazana Ntombizodwa Ncube unina womntwana obhubhileyo obekade kuthiwa kalotsholwe oveze ukudana ngesenzo sikayise esibe lihlazo kumdeni lakuzakhamizi.

"Kangilankani ngesenzo sabangakithi kumbe bekuyimihlola lami kangikwazi. Umntanami wabhubha kwathatha inyanga ezimbili engangcwatshwanga uyise laye wathi kalamali njalo kabuyanga lemfeni.

"Ngicabanga ukuthi sewathatha njengoba sehlukana ngomnyaka ophelileyo kodwa ubaba aphinde afune amalobolo emangcwabeni yena ekwazi lokhu mhlophe.

"Mhlawumbe ubaba wenze lokhu ngoba umama ongizalayo engasekho," kutsho uNksn Ncube.

UMthunywa uxhumane njalo loMnu Ncube yena ohle wavuka ulaka ebuzwa ngaloludaba wathi akudingakali ukuthi achasise ukuthi ukwenzeleni lokhu.

"Kanti wena ufunani endabeni zami. Kuyangizondisa lokho okubuzayo njalo ukuzwe ngobani lenombolo zami zocingo uziphiwe ngubani," kutsho uMnu Ncube ecitsha ucingo lwakhe.

Imizamo yokuxhumana loMnumzana Lovemore Mutasa uyise womntwana yehlule ngoba ucingo lwakhe belungangeni.

UMthunywa uxhumane loKhansila wakule indawo uNkosikazi Thamani Moyo oveze ukuthi indaba le uyizwile.

"Ngikuzwile ukuthi abakoNcube basebethonisa amalobolo emangcwabeni njalo ngisazobuzisisa ngakho.

"Isimanga yikuthi wayesazi ukuthi babengelamali ngoba yimi engabathengela ibhokisi. Kambe umntwana oleminyaka emithathu sengaze ahlale emotsha inyanga ezimbili, qede uyisemkhulu azothonisa amalobolo engakangcwatshwa," kutsho uKhansila Moyo.