Isikolo sami

Nguluben' isikolo sami
Umnyaka wonk'usakhiwa
1980 sibekw' esakuqal' isitina
1981 nguwel' usumi qekelele!
Ngezintath' eziyindingilizi
Sangena sancinda thina
Umbangazw' ungakakuvali wena
Gul'eladikiselw' iminyak' eyisikhombis' ungelachago
Awukaze wabola ,awuzang' uwawon' amasi!
Awuu sikolo sami

Ngifike kuwe ngiyisiphofu.
Bekunzima khon'ukuvuk'ekuseni.
Nxa ngicabang'umango zivele zimpompoze.
Kodwa bengisiwa ngivuka ngisiya khona.
Ngoba lami ngilesifiso,

Lamhlanje ngaz'ukudlala ngosiba.
Sengizaz'ukuthi ngingubani.
Sengaz'ukukhuluma labaphetsheya kwamazwe.
Ngolwaz'engiluthole kuwe ngiyaziqhenya.
Ngilesibindi sokuxoxel'abangane ngawe.
Ngoba sengibona nje nguwe.
Ngulubeni sikolo sami.

Bathi wakhiw' emadlelwen' enkomo.
Bathintith' izandl' abadala.
Bala bekwakha bekuqhelisa.
Kusinda kwehlela babekezela.
Ngob'ukubekezela kudal' impumelelo.
Ngiswel' ezinkulungwan' eyokubabonga.
Ngokusikhathalela thin' abakho
Sangena  sancinda saqeqetsheka.

Basiphek' oTshuma labo Madida.
Lukhala luhawul' uswazi kubokhandatshisa.
Ziqoqodw' iziqoqodo ziqondisw' indlela.
Aphum' amapholisa lamasotsha.
Omongikazi lababalisi.
Ngob'elakh'ibhodo lingena yonk' into,
Ngiyakuthanda sikolo sami.

Halala Ngulubeni!
Halala makad' ehlekwa.
Beth' uzophelel' emoyeni.
Bethi ngekuphumelel' uzohlal' uphansi.
kanti baphange bahleka,
Inhloni bhe! kubomakhelwane,
Sekunzima lokuzoma nje esangweni.
Hee!nguwe lo sikolo sami.
Nguw'osuphakanyelwa nguzulu wonke,
Ezobon'ubuhle bokuzakhela.

Nguwe lo Ngulubeni sikolo sami,
Osuyisibonel'esihle kundawana zonke zeMatebeleland south.
Halala Nguluben'enhle.
Ingulub' ezithandayw' engadlali ngodaka.
Nguluben' isikolo sam'engiziqhenya ngaso.
Ngob'unkamisa ngimazele khona.
Viva Ngulubeni Viva.


Ilotshwe ngu Nomathemba Moyo