'Batshadiswa' sebeyizidumbu abafele engozini yomgwaqo

IZAKHAMIZI  zelokitshini leLuveve koBulawayo zisele zibambe owangaphansi ngemva kwesiga ''sokutshadiswa'' kwezidumbu kwelinye ibandla ngoLwesithathu, uMthunywa ukuvezile lokhu.

Umuyi uRonald Moyo obethethe njalo ehlala ku991 Old Luveve kanye lomakhwapheni wakhe uGetrude Nyathi abafe kungozi yemgwaqweni eKwekwe kuviki ephelileyo kubikwa uthando lwabo luvezwe emphakathini sebeyizidumbu ebandleni okwenze abantu akade besesililweni lesi bathi ababili laba "batshadiswe" sebeyizidumbu.

Ababili laba benzelwe inkonzo nye esontweni andubana bayebekwa ndawonye futhi.

Kubikwa umuyi uMoyo wasuka endlini ngelanga lokudlula kwakhe esiya emsebenzini okwensukwana kukanti yena ubesiya ku-honeymoon lomakhwapheni wakhe okucine kuphumela egcekeni ngemva kokwehlelwa yingozi le.

Izakhamizi ezikhulume loMthunywa zisole ukuthi kungani ababili laba benzelwe inkonzo ebandleni linye bona bebengasonti bonke njalo bengahlali bonke.

"Kungani ababili laba benzelwe i-service eyodwa bona bengakhonzi bandla linye njalo okwenziwe nguMabaleka ukuhlanganisa abantu laba ndawonye khona kusaziwa ukuthi uMoyo ubethethe njalo uNyathi yitshamali yakhe," kutsho isakhamuzi lesi esithande ukwaziwa ngokuthi nguDube nje kuphela.

"Okunye esikusolileyo yikuthi uMoyo wasuka ethe uya emsebenzini kumkakhe olosane olulenyanga ezingu-8 yena esazi ukuthi uyazikholisela letshamali yakhe okwamaviki amabili eyiyo acine setshadiswa layo sebeyizidumbu," kutsho uDube.

Omunye umakhelwane kamuyi uNosipho Bhango ubikele intatheli ukuthi yena ubehlezi ekwazi ngokuthandana kwababili laba njalo babehlala behamba bonke okuyinto ebingafanelanga yethuse abantu. "UMoyo ubethandana loNyathi kodwa angilaqiniso lokuthi unkosikazi wakhe ubesazi ngakho yini.

"UMnumzana Mabaleka owake waba ngukhansila walapha wenze kuhle sibili ngokubahlanganisa lanxa besebethule kodwa lokhu kuzaphathisa ukuthi imoya yabo ibe lokuthula lanxa ngizwela unkosikazi wakhe uSuzi," kutsho uNkszn Bhango.

Kubikwa uMnumzana Israel Mabaleka nguye obeyisikhulumi sokuhlanganisa izidumbu lezo ngesikhathi abafundisi bengakatshumayeli.

Intatheli yenelisile njalo ukuxhumana loMnu Mabaleka yena oveze ukuthi nguye ohlele ukubanjaniswa kwababili esontweni njengoba befele ndawonye.

"Kangilalanga ngicabanga indlela yokuhlanganisa izidumbu lezi ndawonye  esontweni sibavalelisa. Ngicelile kwabakoMoyo labakoNyathi bangivumela ukuthi ngihlanganise izidumbu lezi ndawonye njengabantu akade bezwana kakhulu njalo bafele ndawonye. Lokhu ngikwenzela ukuthi umoya wabo uhlale ndawonye ube lokuthula.

"Bebengumuntu munye lababantu njalo bengatshiyani, lokhu ngokunye okwenza ukuthi ngifune ukuthi bayengcwatshwa ndawonye emangcwabeni eLuveve," kutsho uMnu Mabaleka.

Intatheli yenelise njalo ukukhuluma loyise kamuyi uMnumzana Victor Moyo lonina uMaPhiri bona abaveze ubumunyu ngokufa komntwanabo efela khatshana lomakhwapheni etshiye unkosikazi labantwana endlini.

"Ngisola umfundisi lalo owayengukhansila uMabaleka ngokutshadisa umntanami singavumelananga ngakho.

"Ngiyakwazi ukuthi ubeganga lomakhwapheni wakhe lowo kodwa mina bengingayithandi into yakhe yobudlelwano egangeni ngoba umalukazana thina esimaziyo ukhona ekhaya njalo lowo uze wabulalisa umntanami ehambe laye khatshana lapho esingakwazi khona phezulu kwalokhu bayamtshadisa seyisidumbu," kutsho uMnu Moyo.

"Okwakhathesi sizilile sikhalela umntwana abantu bayasiyangisa ngokumtshadisa. Besivele thina singavumelananga ukuthi benzelwe isikhumbuzo ndawonye ngoba bengangeni nkonzo yinye kodwa simangele sokuthiwa izidumbu kazihle zenzelwe umthandazo ndawonye thina silaye umfundisi wethu ubezasincedisa.

"Ngizwe ngiyangeka kakhulu kumphakathi ngokutshadiswa komntanami seyisidumbu njalo ngihle ngamqonda inkonzo iphela umfundisi ngambuza ukuthi kungani enze into esingazange siyivumelane esihlekisa ngabantu," kutsho uMnu Moyo.

Unina kamuyi uthe uMaNyathi kamazi.

"Umalukazana lo otshadiswe lomntanami kangimazi mina, ubengowegangeni kodwa ngibuhlungu ngoba umntanami ucine etshadiswa eseyisidumbu," kutsho uMaPhiri.

Intatheli iphinde yaxhumana loKhansila wendawo uTamani Moyo yena oveze ukuthi ukuzwile lokho njalo ulethe ukukhathazeka ngehlazo elenzakeleyo njalo waletha ukuxolisa kuzakhamizi ethembisa ukuthi izinto ezinje kasoze azivumele zisenzakala ngoba zixabanisa omakhelwane.

"Ngiphelelwe ngilapha ngoba kasikaze sibone izidumbu zitshadiswa kodwa okwenziwe nguMabaleka loMfundisi kuyaxabanisa omakhelwane ngoba bekuvele kusaziwa ukuthi umuyi ubelomakhwapheni kodwa ukubatshadisa sebeyizidumbu njalo lomfelokazi ekhona kuyinto elihlazo njalo exabanisa abantu sicela ingenzakali futhi esigabeni," kutsho uKhansila uMoyo.