News / National
Amazinyo wohlo ngomahotsha
06 Feb 2017 at 06:24hrs | Views
KULENDODA yeCowdray Park koBulawayo esele ithoba izikhewu kulandela ukukhunyulwa amazinyo ngembodlela ngomunye umahotsha welokitshini leli kubangwa ukwehluleka ukubhadala i$1 yocansi.
Indoda le uDoubt Mapfumo ubhuqwe ngembodlela wakhumuka amazinyo nguLizzy Chirwa besebhawa yeMahweba ngempelaviki edluleyo.
UMthunywa ukhulumisane loNkosazana Beauty Moyo othengisela kule indawo wathi uzwe sokuyisiwowowo wabona uLizzy etshaya uMapfumo ngembodlela ethi kungani engafuni ukumbhadala imali yakhe yocansi.
"Mina ngathi ngizihlalele ntambama ngithengisa ngezwa umsindo eceleni kwebhawa yakoMahweba ngakhangela ngabona uLizzy etshaya uMapfumo ngembodlela ekhanda wawela phansi. Ngalesosikhathi wahle wakhumuka amazinyo amabili aphambili.
"Ngithe ngibuza ukuthi babangani wathi uMapfumo walile ukumbhadala imali yakhe yocansi esithi kalamali yokudlalisa. Okwangimangalisayo yikuthi ngathi ngimbuza ukuthi yimalini wathi yi$1," kutsho uNkszn Moyo.
"UMapfumo uze wamthola usowabo ngoba ubesejwayele ukuhla eqila abantu engabaphi imali zabo. Ngikhuluma nje lami wake wangibalekela engakangibhadali imali yami sokuze kulamuhla engangiphanga. Ngalokhu ngiyambonga uLizzy ngoba umlungisile sibili lami sengizakwenza njalo," kutsho uAngel.
Ebuzwa ngale indaba uNkszn Chirwa uthe okwenze watshaya uMapfumo yikuthi ubesemthethisa ngakolunye uhlangothi esala lemali yakhe okuyiyo aphila ngayo wabuya wathi kafuni ukuzwa umuntu ombuza ngayo ngoba engalimaza.
"Mina okwenze ngamtshaya uMapfumo yikuthi kade ezenzisa esala lemali yami ngapha engithethisa ethi ngingumahotsha. Lokhu kungicaphule kakhulu ngoba imali le yiyo engiphila ngayo. Ngalokhu kangifuni umuntu ongibuza ngakho ngoba laye ngingamtshaya sibili," kutsho uNkszn Chirwa.
Imizamo yokukhulumisana loMnu Mapfumo yehlule ngoba kubikwa uthe ephuma esibhedlela wahle waya kibo eGokwe njalo ucingo lwakhe lwalile ukungena.
Source - uMthunywa
