Isalukazi sigcina umbane embodleleni

KUDABA oluhlasimulisa umzimba kulemuli yeGuwe, eNkayi ezidla izibindi kulandela ukuzwa ukuthi kulelunga layo elilembodlela ''yombane'', inhlabathi yamangcwaba kanye legazi labantu abafayo okuyikho osekuqede abantu emulini kanye lesigabeni, uMthunywa ukuzwile lokhu.

Kubikwa uLwezi Ncube (90) owazakala ngokuthi nguNaNhlanhla ohlala esiqintini esingaphansi kukasobhuku uLivion Moyo utholakale elembodlela abegcina kiyo inhlabathi yamangcwaba okuvele ukuba ivunjululwe ngoLwesine kuviki ephelileyo ivutha amalangabi njalo iphazima okwenze kwathatha amahola amathathu ukuthi benelise ukuyibamba.

Kuzwakale ukuba amalangabi la yiwo abephenduka abe ngumbane.

UMthunywa uzwe ukuthi imuli yakoNcube iphume ijumo yayadinga osiyazi ukuthi bazolungisa umuzi wabo kulandela ukuwelwa ngamashwa ehlukeneyo agoqela ukungendi kwezintombi, ukutshaywa yinkosazana, ukufa kwabantu okungazwisisekiyo emulini kanye lesigabeni obesekudala ukuthi ezinye izakhamizi zithi ugogo uNaNhlanhla ulesandla kulokho.

UMthunywa esizwa ngodletshana lolu kazange athande ukuphozisa amaseko kodwa uhle wabhekisa amabombo kule indawo ukuze ayekuzwa kabanzi ngalindaba.

UThobekile Nkomo ongumzukulu kaNcube uthe kuliqiniso ukuthi ugogo wakhe ubanjwe elembodlela 'yombane' akade eyisebenzisa ukuphosa abazukulu bakhe nxa bengenzi intando yakhe.

"Thina akusimangalisi ukukhitshwa kwembodlela kagogo ngoba sakuzwa kudala kubaphurofethi ukuthi ugogo ulembodlela afika abize amabizo ethu kiyo ukuze sidubeke njalo sibuye labomkethu bazokwenda lapha ekhaya," kulandisa uNkszn Nkomo.


Abazukulu bakagogo Ncube uThobekile Nkomo lomnawakhe


Uqhubekele phambili wabikela uMthunywa ukuthi imbodlela le ibingeyamafutha e-vaseline yakudala.

Uthe ugogo wakhe ubethi engakhutshwa ngumuntu ubengamfungeli ijoyi lamakhala abomvu kodwa ubeqonda embodleleni yakhe afike amemeze ibizo lalowo muntu.

"Ugogo ubesithi engacatshulwa ngumuntu angambhemeli igwayi kodwa ubeqonda embodleleni yakhe yemibane yezulu afike amemeze ibizo lalowo muntu yena uzabona ngenkosazana isimtshaya kuphela mhla izulu lithwalayo.

"Umbane lo ububuya njengalokhu esikujayeleyo ufike uqonde lowo othunywe kuye,'' kutsho uNkszn Nkomo.

UNkomo uqhubekele phambili echaza ukuthi uNcube wayelabantwana abayisitshiyagalo mbili kodwa sebafa bonke ngenxa yakhe.

"Ugogo (uNcube) sizwe ukuthi ubethi engabulala umuntu angabekwa aye engcwabeni ayecupha inhlabathi ayivalele embodleleni yakhe le ukuze ibe lamandla amakhulu," kutsho uNkszn Nkomo.

UMthunywa ubuye waxhumana lomunye wabazukulu owale ukuziveza ibizo oveze ukuthi ubeselesikhathi eside edinga imbodlela le.

"Ngadinga indlu yonke ngathintitha izigqoko zonke kodwa angizange ngiyibone.

"Ngasengisiya biza usiyazi yena owafika wangena endlini yethu wadumela isaka elalilapho watsho eseyiphethe.

Isimanga esaba laso yikuthi isikhitshiwe esakeni imbodlela le kwathatha amahola amathathu ukuthi ibambeke ngoba yayivutha amalangabi ngapha iphazima okombane yaze yacitsha isichelwe ngamanzi," kulandisa umzukulu lo.

Iphephandaba likazulu libuye lakhulumisana logogo uNaNhlanhla ngendaba yembodlela yemibane wavuma ukuthi ngeyakhe yikho nje ikhitshwe emzini wakhe.

"Kangali ukuthi imbodlela ekhitshiweyo ngeyami njengoba ikhitshwe emzini wami.

"Ibilenhlabathi yamangcwaba, inhlabathi le iyatshisa ibe ngumbane. Umbane lo nxa ungasakutshayanga uyakunyathezela ukuthi ungaphumeleli. Okunye njalo inhlabathi le yenza ukuthi abakhwenyana babuye bazohlala kwabozala," kulandisa ugogo uNaNhlanhla.

UMthunywa uxoxisane lomsekeli kasobhuku uSylivia Mpofu Moyo wakule indawo oveze ukuthi sebezake babethwe ngumoya ngoba umbane ubusuhluphile esigabeni.

"Sekuzahlaleka lapha ngoba bekunzima, lami nginje ngo2013 ngaphosa ngahamba umbane watshaya ingalane wakhekheleza indlu wacina usutshise isihlahla. Kungakho ngiyathaba ngokukhitshwa kwembodlela ebivalele umbane," kuphetha umsekeli kasobhuku.