uSomabhizimisi udlova abantwabakhe lomalukazana azibulale

KULOSOMABHIZIMUSI weTsholotsho okhethe ukuquma impilo yakhe ngoba esemangalelwe ngumkakhe ukuthi uhlukuluza abantwabakhe emacansini.

Kucatshangelwa ukuba uNorman Dube obelebhizimuzi yemitshova kanye lezitolo ukhethe ukuthi abomthetho bathonisise isidumbu sakhe ngokuzibophela.

UMthunywa uzwe ngokugcweleyo ukuba lindoda yamangalelwa ngumkayo uManina Ndlovu enkambeni yeTsholotsho kulandela isenzo sayo sokuya emacansini labantwabakhe, kanye lomalukazana wakhe ngeSonto wavuka ezibophele ngoMvulo kuviki ephelileyo.

Esinye isakhamuzi esale ukuqanjwa ngebizo sibikele iphephandaba likazulu ukuthi umuyi engabe ebesenza ukuganga lokhu ngenhloso yokuthuthukisa ibhizimusi lakhe.

"Usomabhizimusi uDube kukhanya ubehlukuluza abantwabakhe kanye lomalukazana wakhe emacansini lanxa lokhu bekufihlwa  kodwa umkakhe kwacina kumudla ngaphakathi wasesiyabikela amapholisa," kuchaza lesi sakhamuzi esingathandanga ukuqanjwa ngebizo.

Isakhamuzi lesi sengezelele sathi mhlawumbe ukuyangisa kwezenzo zakhe yikho okumthume ukuthi azibophele.

UKhansila wakule indawo uJonathan Ndlovu uvumile ukuba behlelwe yisehlakalo esinjalo wabika ukuba udaba lolu lusezandleni zamapholisa.

"Kulosomabhizimusi ozibopheleyo ngoba esebotshiswe ngumkakhe ngokuhlukuluza abantwabakhe emacansini kanye lomalukazana wakhe kodwa angeke ngitsho okunengi, dingisisa emapholiseni ngoba udaba lolu lusezandleni zabo," kuchaza uKhansila uNdlovu.

Omele isikhulumi samapholisa esabelweni seMatabeland North uAssistant Inspector Mandlenkosi Ndlovu uvumile ukuthi kulodaba olunjalo abalwamukeleyo.

"Semukele umbiko kasomabhizimusi ozibopheleyo kodwa angeke ngitsho okunengi ngendaba le ngoba kangikho ehofisini khathesi," kuveza uAsst Insp Ndlovu.