Intombi bhudlu esithenjini lonina

ZILOKHU zikhuza umhlola izakhamizi zesigabeni seSweithe 1 eMbalabala ngemva kokuzwa ngenye intombazana esithandana loyise, uMthunywa ukuzwile lokhu.

Kuzwakale ukuthi uJunior Mufara (22) uthathele unina uVaraidzo Mazanga okucatshangelwa ukuthi uleminyaka yokuzalwa engu-43, umkakhe uDavid Mazanga (38).

UMthunywa uzwe njalo ukuthi uDavid ngumnewabo kaVaraidzo. UVaraidzo loDavid bazalwa ngubaba munye lanxa betshiyene omama.

UMthunywa ukhulumisane lonina kaDavid Mazanga othande ukubizwa ngokuthi nguNkosazana Dube nje kuphela wachaza ukuthi umhlola lo waqala ngonina kaJunior ngokuthandana lomnewabo.

"Indaba le yaqala ngoVaraidzo owathandana lomnewabo uDavid Mazanga. Abantwana laba bazalwa ngubaba munye noma nje behlukene kubonina. Mina ngenda ngemva kokuba uMazanga esehlukene lonina kaVaraidzo.

"Lami ngafika ngazala umntwana oyedwa uDavid sasesisehlukana loMazanga. Ngamangala sengibona uDavid sethethe udadewabo uVaraidzo ngaswela ukuthi ngingabehlukanisa ngithini," kulandisa uNkszn Dube.



UNkszn Dube uqhubeke njalo wachaza ukuthi laye uyakwazi ukuthi uJunior uthandana loMnu Mazanga njalo kalanto angayenza ukuze behlukane.

"UJunior loDavid baqala kudala ukuthandana njalo akulanto engingayenza ukuze ngibehlukanise ngoba kukhanya bayakholisa. Ngokubona kwami uJunior nguye owayefuna umntanami ngoba wayemgqokela obukudele (izigcebhezana)," kutsho uNkszn Dube.

UMthunywa wenelise njalo ukukhulumisana loNkszn Junior Mufara wavuma ukuthi bayathandana loMnu Mazanga njalo wakhululwa ngugogo wakhe, uMaDube.

"Mina loMazanga saqala ukuthandana ngoNkwenkwezi kuwonalo umnyaka ngize ngibuye lapha eMbalabala noma nje umama waqala ukungicabangela kudala ukuthi ngithandana lomkakhe.

"Ngethuba uMazanga engikhombisa ngabuza ugogo ukuthi kuqondile yini ukuthi ngithandane lomalume, ugogo wathi akumangalisi ngakho lami ngasengimkhomba.

"Engingakuvumiyo yikuthi ngubaba ngoba ngakhula ngisazi ukuthi ngumalume ngoba vele uzalwa lomama," kuchaza uNkszn Mufara.

Kuzwakale ukuthi uNkszn Mazanga wathola uJunior elele loMnu Mazanga kumaviki amabili edluleyo wahle wawuhlaba wawulawula umkhosi etshela uninazala ukuthi udliwa izithende ngumntanakhe amzalayo.

Ngemva kwalokho uMnu Mazanga lo Junior babotshwa bayavalelwa esitokisini okwamaviki amabili kuthiwa balecala lokuthandana bona beyizihlobo.

Kubikwa uJunior wabikela amapholisa ukuthi yena ukhulile ngakho ulelungelo lokuthandana lomuntu amfunayo.

UJunior loDavid kubikwa baze bakhululwa ngemva kokuswelakala kwabafakazi emthethwandaba.

UMthunywa wehluleka ukukhuluma loDavid ngendaba le ngoba wahle wathi ebona imota yentatheli wacela ezinyaweni.

Intatheli ikhulume losobhuku wakule indawo uMnumzana Richard Ncube wachaza ukuthi laye uyakwazi lokhu kodwa akulanto angayenza.

"Lami ngezwa ukuthi uJunior uthandana loyise kodwa akulanto engingayenza noma nje kulihlazo esigabeni.

Lokhu kufanele kulungiswe ngabakoMazanga," kuphetha uMnu Ncube.

Imizamo yokukhulumisana loVaraidzo yena okuzwakale ukuthi useBikita yehlule ngoba intatheli zithe zimbuza ngale indaba wahle wacitsha umakhalekhukhwini wakhe.