Latest News Editor's Choice


News / Local

Ubanjwa lendoda yomuntu abaleke enqunu

by Cornelius Luphahla
07 Oct 2015 at 15:04hrs | Views
KUBE yisisanasana ubukhwa bezinja ngemva kokuba elinye inina lesigabeni seMadihola lithole umkalo ezikholisela uluju lwemvelo lenye intombazana wababhuqa kwabancane indawo.

Kuzwakale ukuthi uSiphiwe Ndebele uthole umkakhe uDumisani Ncube esotha umlilo wemvelo loSizalobuhle Ndlovu ohlala ngaphansi kukaSobhuku uNhlanhla Ncube kuviki ephelileyo, okudale ukuthi abatshaye babaleka benqunu.

UMthunywa uxhumane lesinye isakhamuzi sakule indawo uNkosazana Mercy Moyo wachaza ukuthi yena wathola izithandani lezi sezibaleka ngemva kokutshaywa.

"Mina ngezwa umsindo koNdlovu ebusuku ngavuka ngagijimela khona. Njengoba inyanga yayikhanyisa, ngathi ngingena esangweni lomuzi ngabona uSizalobuhle ephuma ethelile ngesiqubu enqunu ememeza ecela ukulanyulelwa.

"Ngithe ngisamangele kwaphuma njalo uNcube esibathela ngejubane exotshwa ngumkakhe ethwele isamboko, ngacatsha ngisesaba ukubona ubunqunu bukaNcube," kulandisa uNkszn Moyo.

Intatheli yenelise njalo ukuxhumana loNkosazana Belinda Ncube oyisihlobo sikaSizalobuhle wachaza ukuthi yena wayehlala emkhuza ngokuthandana lamadoda abanikazi kodwa engalaleli.

"Ngangihlala ngimkhuza ngithi katshiyane lamadoda abanikazi yena ethi bayazibuyela kabadingwa nguye. Ngathi ngimbona sezocatsha emzini wami ebalekela uMaNdebele ngamkhumbuza ukuthi ngihlala ngimtshela.

"Okubuhlungu yikuthi wayelimele ebusweni ngoba kukhanya uMaNdebele wayetshaya kakhulu ngesamboko sakhe," kutsho uNkszn Ncube.

Ekhuluma lephephandaba likazulu, uNkszn Ndebele oveze ukuthi okwenza watshaya uSizalobuhle yikuthi wayesemdelele kakhulu.

"USiza ngake ngamkhuza ngokuthandana lomkami wathi wayengazi ukuthi uthethe. Ngamtshela ukuthi njengoba sengimtshelile kehlukane laye wavuma.

"Isimanga yikuthi kusukela khonapho umkami wayengasalali ekhaya lemali engasangiphi engaze asebenze, abantwana sebebulawa yindlala. Kwathi ngelinye ilanga ngambona esuka ngamlandela ngikhatshana waze wayangena koSiza," kutsho uNkszn Ndebele.

Uqhubeke njalo wachaza ukuthi wafika wacatsha phandle okwesikhatshana wasengena ekhaya sesiyabatshaya.
"Ngafika ngacatsha phandle komuzi ngamekela wangena endlini. Kwathi ngemva kwesikhatshana ngangena lesamboko sami ngafika ngavula ngamandla endlini ngabatshaya benqunu. USizalobuhle waphuma kuqala ngemva kokuba umkami ezame ukungibamba.

"Ngasala ngitshaya umkami laye waphuma wabaleka enqunu ngasengithatha ifoni kaSiza ngahamba layo ngisenzela ubufakazi mhla sithonisayo. Isimanga yikuthi ngezwa kuthiwa kucatshangelwa ukuthi sekoBulawayo ngoba uvuke engekho," kuchaza uNkszn Ndebele.

Imizamo yokukhulumisana loSizalobuhle yehlule.


Source - umthunywa