Kuthunjwe abafundi babanjwa iganyavu okwensuku ezintathu

BAZONDE bagane unwabu abazali belokitshini leOld Luveve edolobheni lakoBulawayo kulandela isehlakalo samadoda amabili okubikwa athumbe amankazana amabili abavalela kwenye indlu ekulelolokitshi andubana abenze abafazi okwensuku ezintathu.

Kuzwakale ukuthi abazali bala amantombazana bathukuthele ngoba lanxa bathi bethola abantwababo babikela amapholisa kukhanya amadoda la amabili kawabotshwanga ayazihambela elokitshini sengathi awenzanga lutho.

Kuzwakale njalo ukuthi abetheswacala laba nguMehluli Moyo oleminyaka yokuzalwa engu-22 ohlala ku1449 kulelilokitshi kanye loSharks Nyathi ohlala eGwabalanda.

Amadoda la kubikwa athatha amantombazana la afunda kwesinye isikolo seLuveve awavalela endlini kaKeith Khumalo lapho okubikwa awazange awavumele ukuthi aphume nanko phela ayezincindela uluju lwemvelo lawo amantombazana la.

Ukucatsha kwabantwana laba kwathwalisa abadala ezindlini amagabha avuzayo ngoba bengazi ukuthi bangene kuwuphi umlindi njalo basebesesabela ukuthi bangabe bedinga abantu asebeyizidumbu nje.

Bathe bebona abantwana bengabonakali okwamalanga amabili bayabikela amapholisa wona ahle aqala ukudinga abantwana laba.

UMthunywa kazange aphozise amaseko, uphuthume wayafika kulelilokitshi ukuyadingisisa ngalindaba wathola abasolwa bona abangazange bachithe isikhathi belandula indaba le.

UMehluli uhle wavumela phezulu ukuthi wahlala endlini lomntwana kamakhelwane okwensuku ezintathu.

"Kuliqiniso sibili ukuthi ngahlala lomntwana lo owenza uFomu 4 eLuveve High okwensuku ezintathu kodwa kangilacala ngoba ngangilentombi yami phela.

"Umntwana lo sengileminyaka emithathu ngithandana laye njalo ngethemba abazali bakhe bayakwazi lokhu kungakho-ke ukusibophisa kwabo akuzange kuyendawo ngoba amapholisa abona ukuthi vele siyathandana.

Angizange ngimbambe ngamandla ngitsho lakancane.

"Akulanto emangalisayo ngokwenzakalayo ngoba sihlezi sisiyachitha isikhathi endlini sisodwa," kutsho uMehluli.

Wengezelele wathi yena lomunye wakhe bakhuluma labazali bamantombazana kungakho-ke kuyamangalisa ukuthi abazali balokhu beqhubekela phambili ngalindaba.

Intatheli ixhumane njalo lowanika abathumba abantwana indlu yokusebenzisa uKeith Khumalo wathi yena umsulwa ngoba akwenzayo yikunika abantu indawo yokuzijabulela nje.

"Mina kangilacala, okwami nje yikuthi nganika abangane bami indawo yokujabula okwensuku ezintathu nje. Mina kangiliboni icala lapha ngoba abantu laba bayathandana njalo babekujwayele ukuzolala ngakithi lamantombazana la. Abazali bekungamelanga bathi abantwababo bathunjiwe ngoba ngabantu abathandanayo esikhuluma ngabo.

"Ngendlela indaba le edale umsindo ngayo ngeke ngisabavumela ukuthi bahlangane lapha futhi," kutsho uKeith.

UMthunywa uxhumane lodadewabo wamantombazana lawo yena oveze ukuthi kuliqiniso ukuba amajaha la athumba abantwana abagcina kwenye indlu yakomakhelwane okwamalanga amathathu.

"Abafana laba baqala babagcina endlini yakomakhelwane bathi besizwa ukuba siyabadinga bayabacatshisa eMagwegwe North yikho okwenza sayamangala emapholiseni.

"Lanxa sabikela amapholisa okusimangalisayo yikuthi indaba le kayizange iyendawo yaphelela nje emoyeni njalo kasikuzwisisi.

UMthunywa uphinde waxhumana loyise womunye wabantwana abatshontshwayo oveze ubumunyu ngaloludaba ngoba ebonisa ukuthi akalalo elinye icebo ngoba engeke wathatha umthetho awufake ezandleni zakhe.

"Thina njengabazali sidabukile ngendlela indaba yokuthunjwa kwabantwabethu eyaphathwa ngayo. Abantwana laba bancane kungakho badlwengulwa ngoba abafana laba babebahlukuluza bebathumbile yikho nje indaba le sayisa emapholiseni.

"Isimanga yikuthi eLuveve sabikelwa ukuthi idokhethi kalisabonakali bathi lacatsha emapholiseni ngesikhathi thina sikhangelele ukuthi udaba luzangena emthethwandaba," kuphetha uyise wabafana laba.